“Картай беларуса” па "карце паляка"?

Намесьнік упаўнаважанага у справах рэлігій і нацыянальнасьцяў Уладзімер Ламека паведаміў сёньня на прэсавай канфэрэнцыі, што ў Беларусі распрацоўваецца закон «Аб суайчыньніках». Паводле спадара Ламекі ён будзе падобны на польскі закон аб “карце паляка”, але адпаведны беларускі дакумэнт ня будзе называцца «картай беларуса».

Паводле спадара Ламекі мэтай закону зьяўляецца эканамічная падтрымка суайчыньнікаў, а таксама прыцягненьне інвэстыцый у эканоміку Беларусі ад суайчыньнікаў, якія пражываюць за мяжой. “Як вядома, асноўныя інвэстыцыі ў Кітай робяць яго былыя грамадзяне, якія жывуць у іншых краінах. І мы так хочам” сказаў чыноўнік.

Нагадаем, што пасьля таго, як Польшча ўвяла “карту паляка”, афіцыйны Менск надзвычай рэзка пратэставаў супраць гэтага, абвінавачваючы Варшаву ў парушэньні прынцыпаў міжнароднага права. Цяпер намесьнік упаўнаважанага ў справах рэлігій і нацыянальнасьцяў кажа, што беларускі закон будзе падобны на польскі закон пра “карту паляка” , “у якой няма нічога кепскага”.