02/19/2006 - 03:47 / ТП-Информ
Апоўдні 18 лютага некалькі дзясяткаў чалавек сабраліся на Смаленскай-Сянной плошчы Масквы, насупраць Міністэрства замежных справаў Расеі, каб заклікаць улады Расеі спрыяць дэмакратычным працэсам у Беларусі. Арганізатарам акцыі выступіла група беларусаў Масквы пры падтрымцы дэмакратычнага моладзевага руху "Оборона" і беларускай лібэральнай інтэрнэт-супольнасьці "Трэці Шлях", удзел узялі сябры дэмакратычных партый "Яблоко" і СПС.
Удзельнікі трымалі плякаты зь лёзунгамі "Канстытуцыя вышэй за прэзыдэнта", "Трэці - лішні!", "Лукашэнку пад суд!", "Не - аншлюсу Беларусі!", беларускія і расейскія нацыянальныя сьцягі. Гучэлі лёзунгі "Свабода Беларусі - братэрскі абавязак Расеі!", "Падтрымка Лукашэнкі - ганьба Расеі!".
З маленькімі прамовамі выступіў каардынатар руху "Оборона" Эргіл Осін, сьвятар беларускай аўтакефальнай царквы айцец Леанід (Акаловіч), дэпутат Маскоўскае гарадзкое Думы Сяргей Мітрохін, прэс-сакратарка партыі СПС Наталья Шаўшукова. Быў зачытаны зварот удзельнікаў пікету да кіраўніцтва Расейскай Фэдэрацыі, у якім яно заклікалася спыніць падтрымку дыктатарскаму рэжыму ў Беларусі, спрыяць правядзеньню дэмакратычных прэзыдэнцкіх выбараў і спыніць перамовы па стварэньню г.зв. "Саюзнай дзяржавы", бо Беларусь прадстаўлена ў гэтым працэсе нелегітымнай уладай.
Акцыю паспрабавалі сарваць прадстаўнікі нэафашысцкіх арганізацый. Пранікнуўшы ў шэрагі пікетоўшчыкаў, нацысты пачалі крычаць экстрэмісцкія лёзунгі і нападаць на ўдзельнікаў пікету, але былі адразу затрыманыя міліцыяй.
Паралельныя акцыі былі зладжаныя ўдзельнікамі і партнэрамі ініцыятывы "Трэці Шлях" у Варшаве і Кіеве.
Знайсьці поўны тэкст звароту да МЗС Расейскай Фэдэрацыі і падпісацца пад ім можна ў інтэрнэце:
http://www.thepetitionsite.com/takeaction/378806998?ltl=1140259973
Отправить комментарий